शुक्रबार मुलुकभर लोकतन्त्र दिवस मनाइँदै

काठमाडौं, १० बैशाख । दोस्रो लोकतान्त्रिक जनआन्दोलन सम्पन्न भएको दिन वैशाख ११ गते भोलि शुक्रबार मुलुकभर विभिन्न कार्यक्रमका साथ लोकतन्त्र दिवस मनाइँदैछ ।
विसं २०६२-६३ को आन्दोलन २०६३ साल वैशाख ११ गते सम्पन्न भएका कारण उक्त दिनलाई लोकतन्त्र दिवसका रुपमा लिइएको छ ।
नेपालमा दश वर्षसम्म सशस्त्र सङ्घर्षरत माओवादीलाई पनि शान्तिपूर्ण आन्दोलनमा ल्याउने आधारका रुपमा रहेको यो आन्दोलनलाई नेपालको राजनीतिक यात्रामा अत्यन्त महत्वपूर्ण रुपमा लिइन्छ ।
यसैका जगमा तत्कालीन नेकपा (माआवादी) र सरकारबीच विस्तृत शान्ति सम्झौता सम्पन्न गरी जारी गरिएको नेपालको अन्तरिम संविधान २०६३ र नेपाल सङ्घीय लोकतान्त्रिक गणतन्त्रात्मक राज्यको घोषणा गरिएको थियो।
देशलाई समृद्धिको मार्गमा उन्मुख गराउन संविधानसभा सम्मको यात्रा यही आन्दोलनको उपलब्धि स्वरुप अघि बढे पनि अबरुद्ध संविधान निर्माण प्रक्रियालाई निष्कर्षमा पु¥याउनु अहिलेको मुख्य चुनौती बनेको छ ।
दोस्रो लोकतान्त्रिक जनआन्दोलनको सफलताका लागि जनताका तर्फबाट धेरै बलिदानी गरिए पनि देशमा जारी अस्थिरताले सबैलाई चिन्तित बनाएको छ ।
ऐतिहासिक जनआन्दोलन २०६२÷६३ सहिद परिवार तथा घाइते सरोकार समितिका अध्यक्ष मेघराज आचार्य नेपाली जनताले ज्यानको परवाहा नगरी आन्दोलन सफल बनाए पनि उक्त योगदानको कदर हुन नसकेको दुःखेसो व्यक्त गर्नुहुन्छ ।
जनताको सङ्घर्षले दल तथा नेतालाई राज्य सत्तामा पु¥याए पनि लामो समयसम्म संविधान दिन नसक्नु, योगदान गर्नेहरुलाई बेवास्ता गरिनुले जनआन्दोलनका घाइते तथा सहित परिवारका सदस्यहरुको भावनामा ठेस लागेको उहाँको भनाइ छ ।
दोस्रो लोकतान्त्रिक जनआन्दोलनका क्रममा विश्वविद्यालय क्याम्पस, कीर्तिपुरबाट प्रक्राउ भइ प्रहरी हिरासतमा चरम यातना पाएका विद्यार्थी नेता राजनप्रसाद खतिवडाले जनआन्दोलनका सहिद परिवार, घाइते तथा यातना पीडितको योगदानलाई राज्यले विर्सन नहुने बताउनुभयो ।
जनताको बलिदानबाट नै २०६२÷२०६३ को आन्दोलनले सफलता पाएका कारण उनीहरुको योगदानको उचित कदर हुनुपर्ने उहाँको भनाइ छ ।
नयाँ वर्ष तथा लोकतन्त्र दिवसका अवसरमा शुभकामना
यसैबीच, नेपाल प्राध्यापक सङ्घले नयाँ वर्ष २०७२ एवम् लोकतन्त्र दिवसका अवसरमा आज शुभकामना आदानप्रदान एवम् चियापान कार्यक्रम सम्पन्न गरेको छ ।
त्रिभुवन विश्वविद्यालय कीर्तिपुरमा आयोजित शुभकामना आदानप्रदान कार्यक्रममा विश्वविद्यालयका प्राध्यापक, कर्मचारी तथा विद्यार्थीहरुको सहभागिता रहेको थियो ।
कार्यक्रममा सङ्घका सभापति प्रा रामेश्वर उपाध्यायले विश्वविद्यालयलाई राजनीतिक भागबण्डाको थलोका रुपमा विकसित गर्न नहुने बताउँदै विशुद्ध प्राज्ञिक थलोका रुपमा विकास गर्नुपर्ने बताउनुभयो ।
२१ औँ शताब्दीका चुनौतीलाई सामना गर्ने किसिमले विश्वविद्यलायले शैक्षिक गुणस्तरीयतालाई जोड दिनुपर्ने उहाँले बताउनुभयो ।
नेपाल प्राध्यापक सङ्घका पूर्वसभापति सुप्रभा घिमिरेले विश्वविद्यालयको प्राज्ञिक गरिमा कायम गर्न विश्वविद्यालय सम्बद्ध सबै पक्षको सामूहिक प्रतिबद्धता आवश्यक हुने बताउनुभयो । रासस