जुरीख। स्विट्जरल्याण्ड निवासी जनार्दन गौतमले गत मार्च महिनामा जेजी फाउन्डेसनमार्फत ओखलढुंगाका तीन विद्यालयका विद्यार्थीलाई शैक्षिक सामग्री, खेलकुद सामग्री र पोशाक वितरण गरेका छन्। उक्त कार्यक्रमले विद्यालयका विद्यार्थीहरूको शैक्षिक अवस्था सुधार्ने र खेलकुदको महत्त्व बढाउने उद्देश्य राखेको छ।
ओखलढुंगामा स्थित कालिका आधारभूत विद्यालय मजुवा, बडडाँडा आधारभूत विद्यालय घुर्बिसे र गणेश आधारभूत विद्यालयका विद्यार्थीहरूलाई फाउन्डेसनले शैक्षिक सामग्रीहरु वितरण गरेको हो।
जनार्दन गौतम, जो स्वयं वडा नम्बर ९ पोकली गाउँपालिका, ओखलढुंगा निवासी हुन्, जेजी फाउन्डेसनका संस्थापक र सक्रिय समाजसेवी छन्। उनले सानो भए पनि दुर्गम क्षेत्रका विद्यालयहरूको अवस्था देखेर सहयोग गर्ने निर्णय लिएका छन्।
गौतमले भने, “नेपालका विकट स्थानहरूमा, जहाँ पहुँच र स्रोतको कमी छ, त्यहाँका विद्यार्थीहरूको लागि केही गर्न सक्नु मेरो उद्देश्य हो। मैले आफ्नो व्यक्तिगत खर्चबाट, परिवारको जन्म दिनको रकम र आफ्नो हिमालयन ट्राभलबाट नाफा भएको रकमबाट सहयोग जुटाउँदै आएको छु।”
जेजी फाउन्डेसनले यसअघि स्वास्थ्य शिविर, विद्यालय भवन निर्माण, र सामाजिक सचेतना अभियानहरू पनि सञ्चालन गरेको छ। विगत दुई दशकदेखि स्विट्जरल्याण्डलाई आफ्नो कर्मभूमि बनाएका गौतमले नेपालमा विभिन्न सामाजिक कार्यहरू गर्दै आएका छन् र अहिलेसम्म ६० लाख नेपाली रुपैयाँको सहयोग नेपाल पठाइसकेका छन्। उनले भूकम्पको बेला पनि नेपालमा राहत सामग्री पठाएका थिए।
“केहि व्यक्तिहरू मलाई सोध्छन् र जिज्ञासा राख्छन्, तिमी यो किन गर्छौ? कहाँबाट रकम जुटाउछौ? कुनै संस्थाबाट वा धर्म प्रचार प्रसारको लागि त हैन? यो नितान्त समाज सेवा मात्र हो,” गौतमले भने। “विद्यालयका विद्यार्थीहरू रुख मुनी, खुल्ला आकाशमाझ, भुईमा बसेर पढिरहेका छन्। म यो देखेर यो कार्य सुरु गरेको हुँ।”
सामाजिक कार्यमा समर्पित गौतमका लागि, उनको उद्देश्य केवल नेपालका विकट क्षेत्रमा सहयोग गर्नु मात्र हो, र उनले भविष्यमा पनि यस्ता कार्यहरू जारी राख्ने विश्वास व्यक्त गरे। “मलाई यो कार्य गर्दा आनन्द प्राप्त हुन्छ र यसका लागि मेरो परिवारको कमाइको एक अंश सहयोगमा दिने काम गर्दै आएको छु,” उनले थपे।
यसैगरी, गौतमका यी प्रयासहरूले नेपाली समाजमा सकारात्मक प्रभाव पार्दै आएका छन्, र उनका मित्र र सहयोगीहरू पनि यस्ता कार्यहरूमा सामेल हुने प्रेरणा लिइरहेका छन्।
